條條大路睇你點揀!醒你香港唔 塞車 隱世秘道

廣告
廣告

香港地車輛注冊數目不斷上升,地少車多,在返工放工時段揸車往往塞到暈,所有主要幹道天橋行車慢到好似蟻躝,過隧道如紅隧壓力倍增好驚比人Hi花,唔想塞車可以點樣?醒多條路比大家行,可能未必快好多但起碼行得郁得好過長時間踩住Brake乾等,如果大家有咩隱世秘道不妨提供交流下!

 

九龍區—>將軍澳區

如果家住將軍澳,放工揸車返去真係塞到Hihi,由觀塘繞道去的話,踏入九龍灣已經可以全塞了!由繞道九龍灣位置慢慢塞到去將軍澳隧道口,分分鐘要你40分鐘或以上,途中急起尿上嚟都幾大鑊。唔想咁樣可以點樣?大家不妨諗諗由清水灣道去,途經新清水灣道,然後到順利邨後行順利邨道,繼續行會駛經順天邨,由秀茂坪道轉入寶琳路,一直行再經寶琳北路前往將軍澳。第二選擇,全程清水灣道然後坑口道或影業路直達。

將軍澳

港島區—>荃灣區

港島去荃灣,一般都係行紅隧再經西九龍公路然後荃灣路,或者行東隧跟住龍翔道同呈祥道鏟住去,好多時紅隧唔使諗5點幾已經開始排隊,由東區走廊近北角開始慢慢塞塞塞到紅隧入口真係挑戰你忍耐力嘅極限。如果行另一邊東隧,放工時間龍翔道車多,同埋又多轉線位,一個唔覺意有壞車或交通意外又係可以塞你40分鐘以上,坐到pat都攰。唔想keep住慢溜,過東隧後紅觀塘繞道往九龍城旺角方向行,太子道東接太子道西(呢段路筆者會行馬頭涌道經迴旋處轉返去太子道西,因為太子道西條橋面都幾塞下),再由荔枝角道駁葵涌道去。

呈祥道

荃灣區—>港島區

荃灣去港島路段,最常行係荃灣路駁西九龍公路,之後經麗翔道再揀行紅隧定東隧。第二條路喺荃灣路接呈祥道龍翔道到觀塘直鏟東隧。邊條路順D?如果順暢時,經呈祥道龍翔道返去港島區都係半個鐘多DD左右,如果經西九龍公路的話還是行佐敦道(唔行麗翔道因為近果欄位轉上橋較塞)轉返去行紅隧穩陣過行東隧,一般都係塞係漆咸道南近理工大學一陣,10零分鐘左右就可以過海,如果喺漆咸道南行返去觀塘方向經東九龍走廊行觀塘繞道的話,分分鐘又喺繞道上面塞你半個鐘以上,因為入將軍澳嘅車塞死晒條路,筆者賴過野唔會再咁行,真喺唔記得左行咗啓德隧道過去的話,行返地面啓福道去觀塘再行東隧會比較好。
如果行開呈祥道見佢塞想走人就往九龍塘方向出口接住行大埔道往深水埗方向走人,經欽州街接欽州道西,再行連翔道往尖沙咀方向駁佐敦道行紅隧返去,記住都係唔好諗住行觀塘繞道,同一理由前面有講無需多提。如果行繞道寧願行返龍翔道,路面唔係發生意外嘅話塞極有個譜。

廣告

港島區—>沙田區

港島去沙田區,常為行走紅隧駁獅隧,或東隧駁大老山隧道。紅隧駁獅隧為指定動作都走唔甩,東隧嗰邊直走駁大老山隧道好多時去到見到Megabox已經塞,點好?可以係繞道出九龍灣出口,落橋後燈位右轉常怡道,然後再轉入偉業街,再經觀塘道見到沙田隧道牌上返繞道排短D。

觀塘繞道


追加!過隧道TIPS

究竟有無邊條路唔使排咁耐?有無多條路可以行下?同大家分享下。

東隧:
由柴灣方向東廊西行往往剛到筲箕灣就排隊,可以試試下面路線。

1)東廊出筲箕灣出口,右轉愛禮街經愛勤道再左轉太安街去返東廊排短D;

2)東廊出筲箕灣出口,經東喜道轉南安街,右轉愛秩序灣道再左轉入愛信道去返東廊;

廣告

近太古或康怡的話,直接由英皇道轉上康安街駛經康怡花園再入東廊。
由銅鑼灣方向經東廊東行去東隧如果塞車的話,可以先落北角,再經渣華道駛到廉政公署總部大樓前燈位左轉返回東廊,咁樣塞少好多。

東隧Wikiwand

紅隧:
從港島區東行嘅唔洗諗都係告士打道排隊,如果唔想早早排隊,可以由謝婓道轉上馬師道天橋然後左轉鴻興道再經杜老誌道轉返入告士打道排少D。
從港島區西行一般東廊乖乖排隊等過,見到未到北角城市花園已塞,如果唔想等,可以點行?

1)可以由炮台山經清風街天橋重新入翻告士打道。如果係英皇道已經見到清風街天橋塞?

2)英皇道轉入清風街,經電氣道興發街再入告士打道。或者;

3)告士打道轉港灣道再入翻告士打道東行先排隊。

從九龍區過紅隧返港島,如果由主要幹道公主道或西九龍走廊行都無得點揀。如果由尖沙咀去,可以咁樣:

1)漆咸道南右轉暢運道經康泰徑轉入紅隧;

2)經麼地道行到千禧新世界酒店燈位右轉科學館道再過紅隧。

另外,筆者唔建議行柯士甸道經暢運道過紅隧,真心塞到PK,試過塞咗成個鐘先玩完條柯士甸道,真心火滾。

紅隧

西隧:
西行去西隧一般經告士打道再由干諾道中前往,塞都係塞告士打道一段唔算十分嚴重。

塞車過海除咗用咗好多時間,過收費處比錢後幾線合一車多容易碰撞,過東隧還好,紅隧對好多新手嚟講係一個惡夢,早排網上有張圖標注難易度,筆者也看過,而家同大家分享一下筆者嘅想法。

紅隧收費站總共有7條行車線,過收費處後7線合2線,筆者經常行紅隧,留意到一些過隧道時嘅集慣,我將路線分為2部分:

左面和右面(左面為左1至左4行車線(從左至右),右面為右1至右3行車線(從右至左))。通常左面第1條至第4條行車線最後滙合為1條線,右面第1至第3條行車線滙合為1條線,這樣就可以看出來3線合1是比4線合1容易,所以對新手嚟講,最容易行喺右面第2條行車線(右面autotoll隔離嗰條),因為右2在入線的位置上比右3佔了先機,右3於切入右2時通常會禮讓右2的車輛先行。
如果你在右2行車線上,主要較為集中留意右1車輛的行駛情況而決定切入紅隧右面管道的時機。第2條比較容易的行車線是左2,理由跟右2行車線原理一樣,左2行車線在切線位置上也佔了先機,但沒選為最容易原因是所有大型車會於左面行駛,對新手或會構成壓逼感。最後比較困難的就是左3和左4,需要和其他車輛滙合的情況較多,而且切線時機較為被動,比較難掌握。

紅隧2

上面分享咗一D行車路況同過隧道路心得比大家,塞車時都叫可以行下快少少,大家揸車時實試過塞車塞到傻,實會兜下其他路搵下出口,不妨講出嚟交流討論下。

(61051)