再冇一把靚聲取代到你 再見 Chester Bennington

2017年7月21日, Chester Bennington 自縊身亡消息震驚全世界。我自己亦無法相信,2個月前我哋先同Linkin Park的Mike Shinoda做過一個短訪。對於呢支啱啱推出新專輯並開始巡迴演唱會的樂隊,突然失去主音,我諗LP眾成員比起我哋更傷心、更手足無措。

Chester Bennington

image
Rest in peace, Chester.
這張來自Chester妻子Talinda Bennington官方Twitter的cover photo,照片可見眾人滿臉笑容,但今日已經變成歷史。

我有刻諗唔通,Chester明明過住一個幸福美滿的家庭生活,有老婆、有6名仔囡,生命應該唔再空虛寂寞,但點解依然要走上絕路?Chester曾經以過來人的角色分享自己如何走出抑鬱,佢話:「你唔一定需要搵一個最值得信賴嘅人傾訴,其實身邊所有人都係你嘅傾訴對象, 將你心底所有嘅情緒一次過講晒出嚟,接受自己有脆弱嘅一面係冇問題的。」可惜,最後佢敵不過自己的心魔。

記得今年初《One More Light》宣布即將推出,外界的評價不一,而多半樂迷都係幾乎批評曲風過於Pop,只有部分人真係鑽進歌詞裏,體會到當中係Chester的真情告白;今日Chester離世,那些歌詞就更顯得有血有肉。
其實多年來Linkin Park一直找尋自己可以駕馭的曲風,由最初nu-metal,慢慢演變rap-metal,到今日大家可能唔太喜歡的Pop,我覺得佢哋做音樂的宗旨一直冇變到,都係想做一啲好音樂,只不過響過程中用唔同的approach。

咁多年嚟唯一冇變的,依然係Chester把音準極穩定的靚聲,就算經過咁多年的嘶喉與吶喊,你好少聽見佢唱live時會降Key。

至於痛失咗一名無人能取代的主將,相信Linkin Park短時間內都唔會有任何新作,然而Chester在所有樂迷心中的位置,已經係達到不可磨滅的程度,所以假若要搵人取代佢,係好難會work。

(9344)