【男鞋花邊】 高層都睇唔過眼,幾舊水對波鞋搲?!

300250

近日如常出席定期飯局同一班潮流業內人仕聚聚舊,交換消息談天説地,話題千奇百怪,其中當然唔少得LV x Supreme呢類話題,講吓香港翻咗幾多貨,邊個明星Keep咗咩貨等等,又會講吓對Tom Sachs火星鞋2.0多唔多貨難唔難買,摸吓酒杯底,分享吓共同興趣,不亦樂乎。

Supreme X Louis Vuitton: All the looks from the collection.

香港某啲Item翻得少之又少,VVIP先買到,唔怪得俾人抄到上天,尤其是個Keepall 45

(Image: WWD)

v1_002

Nike Mars Yard 2.0又係少得可憐,唔駛旨意個價會落得多。

(Image: Hypebeast)

表面上現實世界網路開放消息流通得快,日日玩Social Media睇料索料,但其實都只是屬於「面嗰浸」唔知第幾手消息,公開得嘅消息即係人人都知,價值何在?所以收集第一手情報到今時今日仍然是玩得叻的重要指標,試問當大大個公司高層坐喺你面前,還需要再周圍去打探消息嗎?雖然朝中有人好辦事,但都唔好令人難做,最低限度要識分有咩圍內聽完就算,口比心更密,正如個個朋友見面都例牌會問下集《有班教父》會搵邊個嘉賓,從來由我口中得知嘅人一隻手掌數得哂,真係信得過唔爆響口又夠Close先會講,否則免得就免,需知道這個世界有太多靠「賣消息」活口的人跟你稱兄道弟。

騙徒手法層出不窮

話題一轉,某某運動品牌高層怨聲載道:「最頭痕就係遇到啲死搲爛搲嘅卒仔,你話搲啲貴嘢特別版我都明,但係佢哋係連啲幾百蚊嘅普通鞋都要搲!」說到這裡,成枱人你眼望我眼會心微笑,然後他再為我們分享他們的死纏技巧,普遍來說他們會像每個月唔方便的日子般定時定候出現,不清楚還以為爭大耳窿錢被人追數,而每一次他們都會好婉轉地問,例如「棋魂」會扮專家:「今次對鞋個色好接近原版,不過個色Off咗無咁實,同埋個料好似唔同,有冇實物俾我幫你研究吓?」還好這位高層見慣風浪道行夠深,對住小嘍囉只需要拋下一句「冇Size」就可以四両撥千斤輕輕帶過,遇上心情好可能會加一句「下次啦」,而當晚他終於爆出心中那幾句,勞氣地說:「幫我?講得幾好聽,你話如果佢手上有對原版就講得通啫,我親自送到佢手上都仲得!橫睇掂睇佢都冇,況且係佢有興趣唔係我有興趣,究竟件事係邊個幫邊個呢?」這位高層越夜越可愛,爆得興起突然說一單更爆的搲鞋事件,繼續說:「佢再絕啲我都見過,竟然夠膽死話依對鞋我細細個見我老豆著過好懷念,唔知有冇我Size呢?」他心想既然有這片考心,為何不直接燒對俾祖先呢?現場人仕聽到這裡無不捧腹大笑,拍案叫絕,原來,搲鞋都可以很有創意。

v1_003 v1_004 v1_005

原來幾舊水嘅波鞋都好有市場。

(Images: Nike, Haven, HUH)

自已買變品牌送

歡笑過後,席間另一位老闆突然氣上心頭搭嘴,提起另一單「笑料」,他說:「光仔(化名) 每次同PR攞完折買鞋之後,都會出埋啲Post又多謝又乜乜物物,講真Seeding同送禮已經係兩回事,更可況你係比錢出嚟買又點叫做送呀?其實真係要做Seeding,我哋會一早就Hold起啲貨係專門用嚟送比人。例如2018SS嘅某某合作版,依家七月已經開始預備比我哋有心SeedIcon。」間中送一兩對鞋給媒體們打打關係屬合情合理,屬見慣不怪之事,但千萬不要陰陰濕濕扮Icon(要扮都拎塊鏡照吓自己個樣先啦)。說一套做一套,寧願做個開宗明義的真小人都比做個謙謙有禮的偽君子好。

其實現時做媒體已經比十多年前進步得多,當時莫講話送,連影相都要等巡迴,同一對鞋要在一週間被五、六間媒體「輪」,遇到一些心地不好的記者或編輯,會特登將鞋Keep起令其他雜誌趕不上而脫期,甚至索性收埋扮唔見,邊似而家咁幸福。品牌負責人的眼睛是雪亮的,你們是學生,他們是老師;你們交功課,他們收功課;有誰做得好,他們最清楚,只要做得好,禮物不用開口也會自然送上,別以為揸起支筆就有個「任搲金牌」。

本故事如有雷同實屬對號入座。

TXT BY GEEKYBRIAN

(4950)