【 #頭暈慎入 】香港轉到你癲嘅停車場

頭暈停車場 總有一個喺左近

香港地少車多,停車場除咗有出哂名嘅世界級地獄停車場,仲有另外一種充滿特色嘅旋轉木馬停車場,喺你到達泊車樓層之前不停地轉呀轉呀轉呀,溫馨啲嘅你當玩緊旋轉木馬同咖啡杯,但如果耳水唔平衡嘅部車行快少少咁轉法真係比你轉到暈一暈,其實而家好多shopping mall嘅停車場都係採用咁樣嘅設計,見暈都無計都要照泊,不過就行慢少少啦,如果唔喺坐你隔離嗰個突然嘔哂出嚟到時真喺唔知你喊定佢喊好喇。

中環國際金融中心二期停車場ifc

中環國際金融中心二期停車場,即IFC停車場,我同一位好易見暈嘅朋友一齊去轉下。我哋由金融街慢慢駛入停車場入口,開始我哋嘅浪漫旋轉旅程。輕輕踩住少少Brake,轉轉轉...轉轉轉...10秒,20秒,30秒,40秒......直到第55秒,以為掂啦終於到埗,啊頂原來唔泊得要再繼續轉,無計啦再轉落去,去到第70秒絡於到B4可以泊,但穩陣起見又唔想搵咁耐位,就轉多落一層啦,用咗85-90秒終於到達可以停車泊卡入閘啦!而我朋友就話佢真係見暈,佢轉到10零秒左右就合埋眼,仲話有少少想嘔𠻹!

九龍塘又一城停車場又一城

嚟到第2站,我哋試吓又一城先。去到達之路入口,get ready,go!朋友今次叫我揸慢少少。我哋又嚟轉轉轉”如何地轉...嘔心瀝血原地在轉...轉不出快樂仍在轉...我氣就快斷”傅珮嘉 隻歌喺呢刻最啱聽,心諗轉忍完未呀,我朋友都話見暈唔舒服。轉到第60秒,終於見到唔同嘅場景,到咗的士站同上落客區,好,再轉,轉到第75-80秒左右終於到入閘口喇,計返同IFC轉得差唔多時間啦。泊好車望一望朋友,佢話唔掂要抖一抖先落車。

鷹君中心停車場螢幕快照 2017-09-05 下午12.48.25

第三站,嚟到鷹君中心停車場,我哋由港灣道轉入,呢個停車場條路比之前兩個場窄DD,加埋2邊石屎牆,望落去同銅鑼灣禮頓中心停車場條路好似,穩陣少少唔想Hi花就行慢D啦,不過條路其實都夠哂闊嘅。轉又轉又轉...定哂格咁轉真係有啲悶,由閘口上到嚟4樓大約用咗50-55秒左右,再轉上多2層去到6樓,用咗大約80-85秒。今次見暈朋友話呢個場ok佢完全無事,連佢都唔暈咁個場真係無料到。

Megaboxmegabox

九龍灣Megabox停車場,禮拜六,日人流極旺要排隊上等到PK,燥底嘅都係少嚟為妙。而最大鑊係個時租停車場最高去到15樓,樓下無位嘅就又要轉呀轉呀轉一路鏟上嚟,要衝上雲霄去到頂層先有位泊。又計一計時先,由地下轉到去閘口泊卡用左2分鐘左右,奈何次次咁轉法真係會轉到人都癲,而家仲要爆上10幾樓,立即上身8,000轉爆上去,最終都要用咗將近3分鐘先到頂層。

合和中心停車場螢幕快照 2017-09-05 下午12.49.11

灣仔合和中心停車場,入口喺堅尼地道,我哋又嚟轉入去睇下...由入閘口開始,15樓一路右轉右轉右轉,14樓,13樓,其實都叫幾好轉用咗50秒左右就轉到時租12樓嗰層,如果想轉到落10樓就用多30秒左右,入去泊車真係完全無問題,車位又夠大,出車或者會賴野,如果第一次嚟真係有機會miss咗個出口位,一路轉上左轉左轉左轉,但睇錯miss出口又一次右轉呀右轉,如是者不停地右轉又左轉,真係會問自己係咪賴左嘢,唔停咁喺原地自轉,走唔出個迷宮一樣。

采頤花園停車場螢幕快照 2017-09-05 下午12.49.42

新蒲崗采頤花園停車場,外面望落去一個正常不過嘅停車場,實則又係玩咗你都唔知。時租車位喺7樓,都正常嘅啲有蓋同低層位緊喺留返比月租等佢哋轉少啲,咁就轉啦轉啦轉啦,又唔對路喎,轉極都有,究竟轉到幾時?頂你個掣,其實轉2層先等如轉完一層樓,轉上7樓就等如轉上14樓......妖,嘥Q哂啲時間,又嘥啲油,肯定無下次。

(圖片來源:網絡)

(13235)