【#香港窄到喊路段】明係考你牌

廣告
廣告

辛辛苦苦考到個車牌返嚟後,梗喺要賀一賀佢去兜吓風啦!對於一個新牌仔嚟講,香港路窄車多,加上而家好多人揸車都燥底,行慢少少都砵你兩嘢,揸車嗰時唔多唔小都有啲壓力。想舒舒服服兜吓風,盡量搵啲路面廣闊嘅路段玩吓攞多啲經驗先,下面呢幾條路,新手去行應該都會騰雞,如果係新手嘅你就避避先啦,操多一排個人多小小信心先去挑戰一下,如果唔係揸到騰晒雞比啲朋友笑到面黃就無引啦。

大潭道-大潭水塘主壩路段大潭水塘 tesla大潭

如果想由東區去赤柱嗰度兜吓風,行吓沙灘談談心,大潭道係必經之路。一直沿路入去,路面情況對新手嚟講喺比較困難,車來車往,沿路窄而多彎,加上又多巴士,好多時係入彎時真係要收一收油睇清楚先好過,因為巴士好多時都會踩咗小小條線先轉到彎。克服咗半段路,真真正正最窄嘅路段而家先出現,就喺大潭水塘主壩條路。呢段路闊度唔足5米,2架重型車無辦法同時駛過,早排就有部tesla因為咁而塞爆,如果驚驚喺水塘主壩路行行吓撞到有巴士經過嘅話,自問信心同技術不足嘅話,或者兜遠少少由香港仔或者黃泥涌峽道嗰兩度入赤柱啦!

柯士甸山道柯士甸山道

柯士甸山道,去完凌霄閣玩完一轉之後如果想上太平山山頂sweet sweet,一定行經之路,前半路段還好都係兩線行車,中後段一直keep住單程雙行,雖然耐唔耐都有避車位,但真係小心啲慢慢揸唔好劈住咁上,始終唔知幾時出現對頭車,又多行人行上山,都係小心駛得萬年船啦。

廣告

施勲道施勲道

山頂半山區又一窄窄力作,窄過你着窄身衫。呢條豪宅林立嘅路段,行車有雙行同單行,行到中段道路兩旁有好多樹木,好似揸住架車去行山咁,係香港呢個石屎森林嚟講實屬少見,好啱嗰啲話自己鍾意行山但其實唔去行山嘅人,不妨揸架車去走轉就當自己行咗山。施勲道沿路無乜避車地方,記住都係要慢慢揸,呢度住宅比較多隨時要讓車。

大帽山道大帽山道

廣告

香港最速公路傳說,乜乜大帽山車神,頭文字D後呢度成為非法飛車熱門勝地,個個走完一轉大帽山就當咗自己係車神。其實行車都喺只可以行到半山,條路畫就畫咗兩條行車線,但路面都唔算特別闊,有幾個讓車位都算ok,千祈唔好頭D上腦,一個飄移真係可以轆落山bye bye

盧吉道盧吉道1 盧吉道

盧吉道,其實呢條路係唔比行,除非你住係度有許可證先入得,但試過有唔少盲毛撞咗入去,條路太窄行唔番出去要報警嗌救命。呢條路最闊嘅路段只有1.8米,其餘路段再窄啲,架車長少少同闊啲真係唔知點樣可以全身而退轉返出嚟,如果盧吉道解封,咁多位師兄有冇興趣挑戰吓?

香港窄路處處,好多因為地理環境關係比較窄,例如山路,大家有無行過一啲離晒罩窄到pk小晒鬼嘅路?有嘅話分享一下,等大家留意吓行得安全啲。

(Pic source: google/youtube)

(4347)