【#香港爛路】頭暈爆軚唔好問點解

爛路 一條都無計 頂硬上啦

馬路炸彈,除咗一眾推車L同唔守規矩嘅駕駛者可以KO你外,其實一條爛路都可以攪掂你。可以試想一下,揸緊車經過一條爛熔熔嘅路,路中突然出現一堆凸起嘅瀝青然後一個大窿,避唔切逼住駛過變跳跳車跟手過窿Un到架車震一震,傷到懸掛同避震事小,引起事故事大。所以真係唔好睇小爛路嘅威力,除咗影響揸車時嘅舒適度,分分鐘可以收你皮。究竟有邊條路特別熔熔爛爛?揸車經過時跳到飛起?

龍翔道呈祥道龍翔道

龍翔道和呈祥道車輛流量大,路段使用次數頻繁,大型重型車輛橫行,加上一眾重型貨櫃車車手,你見佢哋可以飛住去,上斜都踩地板油咁keep住右線去過車,幾條線都比佢哋哂,就明點解條路咁多位都一忽忽啦!每次行親都凳住去,架車痛之餘真係肉痛呀!

窩打老道窩打老道

行獅子山隧道出九龍方向,過完獅隧行窩打老道,條路啲瀝青又係一忽忽,都幾凳吓!如過係要過香港,又要接住行公主道,公主道有幾個位都爛啲啲,就算我係由沙田出銅鑼灣,我寧願行多啲路由大老山隧道經觀塘繞道再行東隧算,條路起碼平坦啲同少啲彎,揸起嚟舒服啲。

環保大道環保大道

過咗將軍澳隧道行環保大道入將軍澳工業村,由於多泥頭車行,條路嘅狀況都好一般,由其過咗邵氐片場後嗰一段落斜路,條路都喺左一撻右一撻,加甘泥頭車喺你旁邊飛沙走石,十足十跑Rally一樣,凳完一轉入工業村架車都幾污糟吓。

薄枎林道薄枎林道

呢啲上上落落嘅斜路好似特別多問題出現,薄枎林道都出現同樣情況,因巴士行駛較密,損耗都較快,成條路不同路段都有啲地方被鏟走一忽,凹凸不平。

干諾道中干諾道中

干諾道中由中環向上環方向,呢段路好似玩Mario咁,特別多渠蓋,Mario揾渠捐落去,呢度就要左閃右避,因為好多時有啲渠蓋係特別凹咗落去,咁樣Un一Un都覺得傷,所以揸車經過呢度真係要打醒十二分精神。

喺香港爛路情況非常常見,尤其打風落雨後爛路特別多,瀝青被推起或者路穿窿。除咗瀝青問題之外,可以喺修路時放置鐵板不平,一轆過隨時爆軚,另外就係路面左修右補,但喺鋪得高高低低高度不一。好多時一條剛鋪好靚靚嘅路,過一排水務署特然放個Sorry牌喺度鑽地開工,以為完工鋪好喇但隔一排又到乜乜署又鑽地玩過,所以啲路成日補到東一忽西一忽。最後或者真係要加強重型車輛使用道路嘅守則,如果唔係啲路真喺補完無耐又爛過,晒氣。

 

(Pic source: google)

(1002)