【男の通識學】軍系古著の王者:美軍專屬MA-1

軍系古著の王者 MA-1

廣告

好多人唔明白 VINTAGE 或者古著嘅真正意思,以為殘殘舊舊著咗三五七年嘅衫就可以劃上等號。其實古著比二手衫有價值得多;二手衫純綷係著過嘅舊衫,而古著係指能夠反映歷史背景同埋擁有持久價值嘅舊時代產物,兩者嘅層次完全唔同。90年代日本人帶起咗古著文化,將牛仔衫褲、軍裝、WORKWEAR 三大歷史產物變成一套學問,從此每件 ITEM 每條拉鏈每粒鈕扣都成為歷史教材,就好似今次要同大家講嘅 MA-1。有冇諗過點解呢件曾經係美國空軍嘅制服嘅內籠係橙色?點解外面一定要係綠色尼龍質料?點解手臂位有個永遠用唔着嘅拉鏈袋?你又知唔知 MA-1 其實係經過多次細執?

MA-1 首次出現就係喺 1949 至 1950 年之間,屬於二戰時期中等重量飛行服B-15嘅後繼型。對比翻前身嘅 B-15,最明顯嘅改動就係取消咗頸邊嘅絨毛領位,同埋轉用咗橙色嘅內籠。其實 MA-1 誕生嘅原因非常單純,就係當期時噴射機嘅出現,意味住戰機可以飛得更高更遠,所以美國國防部要求 ALPHA INDUSTRIES UPGRADE 飛行員嘅制服,從而製作出更加舒適、耐用、適合各種氣候變化嘅萬能軍服。佢嘅設計係非常適合攝氏 10度 至到負 10 度嘅濕冷氣候,因為兩層尼龍中間夾咗塊雙面嘅保溫物料(58%羊毛同42%棉花),而外面軍綠嘅物料係採用美國杜邦公司開發嘅6-6飛行尼龍。由於佢嘅密度好高,所以係極度防風同埋防水,普通落雨都唔會濕到落湯雞咁,仲可以輕易跣走,所以 MA-1 喺 1958 年正式獲得美國政府首張政府合約,從此變成航空飛行技術嘅專用材料。仲有!飛行員如果喺上機之前淋咗一身雨,抹都唔抹就咁行入機艙,啲雨水好大機會就會喺冇環境控制系統嘅駕駛艙入面結冰,所以呢個時候軍綠保護色嘅尼龍材質嘅 MA-1 就大派用場,而皮製嘅 A-2BOMBER 亦都隨即逐漸淡出飛行界。

(431)