【#年廿八洗邋遢】自己落手打蠟係型嘅

打蠟 自己來 新年唔發呆

廣告

img-261278511-1457990749944(source: cstatic-images.com)

適逢臨近新年, ,大多車主都想幫愛車扮靚過新年。出街搵汽車美容店打蠟動輒幾千元或以上,加上而家先搵可能已經爆晒無舖可以接你生意,如果有時間嘅不如自己愛車自己打蠟,當做吓運動慳返啲錢食餐勁嘅獎勵吓自己都好啦。

準備幫愛車打蠟前要預備啲咩野?首先要有泥膠用嚟起漬,跟住要有打蠟用嘅車蠟啦,然後就喺一個海綿用嚟上蠟,最後需要1-2塊纖維抺布用嚟捽蠟。另外需要注意嘅係千其唔好喺烈日當空同埋車熱下打蠟,因為溫度太高時上蠟會好難上推唔郁同唔均勻,落蠟時亦好難捽走。所以打蠟最理想環境係喺陰涼通風處嘅地方進行。

打蠟Steps

1.洗車

打蠟前當然要幫部車洗乾淨先,部車成身灰塵嘅話根本就打唔到蠟。注意,洗完車後不用抺乾車身,可以直接進入第2個步驟。

2.用泥膠起漬

洗車後可以開始用泥膠走漬同捽走啲深層污垢,確保打蠟時唔會比啲污漬呀鐵粉粒同塵粒之類刮花車身,所以全車都要用泥膠捽一次,完成後抺乾車身。如果閣下揸嘅喺新新地幾個月貨仔嘅車就無需要做呢個步驟啦,因為新新地嘅車唔會有嗰啲陳年舊漬,可以跳過唔洗用泥膠起漬呢個步驟,直接抺乾車身。

3.上粗蠟

抺乾車身後可以開始用海綿上粗蠟,上蠟時採用打圈方式,咁樣上蠟比較均勻,同埋上蠟時唔洗用太多蠟,份量滴中唔好堆到啲蠟一舊舊咁,因為捽走啲蠟時會比較困難。打粗蠟先主要係去除車身花㾗,平滑車身,如果想部車靚仔啲閃啲呢個步驟就要做足啲啦。

4.上幼蠟

做好底層粗蠟後,可以開始上幼蠟,上幼蠟方法同上粗蠟一樣採打圈方式,幼蠟作用主要係進一步磨走細少花紋,起到拋光嘅作用。

5.上水晶蠟

最後步驟就係上水晶蠟啦,水晶蠟嘅作用首先係令到部車閃令令啦,仲有可以保護車身漆面,喺落雨時揸車減輕酸雨對車身漆面嘅影響。上蠟方法一樣都係打圈咁上,大概等10-15分鐘左右(視乎你用邊隻牌子嘅蠟,等候時間會有少少唔同)就可以開始落蠟,捽走哂車身上嘅車蠟,就睇到自己部愛車閃令令啦!

打蠟注意事項

1.做完整個打蠟工序,如之後想架車keep住閃令令,可以平均個半到2個月左右打一次蠟(泊露天可以密少少一個至個半月),但就可以唔洗再用泥膠起漬,同埋唔使上粗蠟同幼蠟呢啲步驟,直接只要洗車然後上水晶蠟同落蠟即可。

2.打蠟時最好唔好將啲蠟Hi到汽車塑膠部件嘅表面,因為好難捽走。唔小心錯手Hi到嘅話要盡快捽走,因為停留越耐就越難捽。

3.上蠟時如果見到個海綿有車身漆面顏色要立即停止,因為車身漆面有地方受損。

4.上水晶蠟同落蠟最好係分Part嚟做,唔好上哂成車水晶蠟先嚟落蠟,因為啲蠟上得太耐又喺好難捽走。如果做緊車頭就做哂成份車頭上蠟落蠟先然後先去做車頂車門嗰啲。

5.上蠟唔好上太多一舊舊,難乾又難捽。

自己幫愛車打蠟後當然充滿成功感,而且真係可以幫閣下個荷包慳追唔少!出面嘅汽車美容舖而家一般都係做3層起花打蠟,3層嘅意思係指起漬、拋光同埋上保護蠟,價錢由$2,500-$4,000不等,而家除咗3層打蠟外,仲有啲係5層起花打蠟(7層都有添),價錢可以上到$5,000-$6,000,如果比人Sell多兩Sell做埋鍍膜,分分鐘$8,000-$9,000落樓,都咪話唔肉痛......自己當做運動,買盒蠟百零蚊(第一次起漬要買埋泥膠粗蠟女幼蠟嗰啲),加埋海綿同抺布嗰啲,都係幾舊水有找,最重要好多時去街舖打完蠟佢話可以Last8-9個月,但個人覺得Last 2個月都唔得(可能我去幫襯嗰啲手工都唔好掛),咁不如自己出一身汗試吓啦。

meguiars 3m(source: ebay)

(616)