【#奧斯卡頒獎禮】收視仆到直一直,死因係乜?

奧斯卡點解少咗人睇?

廣告

眾所周知,奧斯卡金像獎頒獎禮係全球電影界最有影響力、最具指標嘅盛事,一個咁有權威嘅典禮自然會吸引世界各地唔同媒體專程做直播,俾觀眾飽眼福之餘又增加自己收視,一舉兩得。以往呢條橋真係行得通,到咗近呢兩年個勢頭開始唔對路,奧斯卡頒獎禮收視率係咁跌,今年跌勢仲勁,跌咗大約20%,成為史上收視率最低嘅一屆。唔怪得一向同娛樂圈唔啱嘴形嘅侵侵總統 (Donald Trump)即刻現身串返兩嘴,話今次收視咁差係因為美國除咗佢之外冇晒明星,果然及時行樂!呢刻,一眾大牌明星實俾呢個「死敵總統」激到頂心頂肺,所以奧斯卡主持Jimmy Kimmel都回敬總統一句。

螢幕快照 2018-03-07 下午3.39.25

隔空嘈完條氣係會順少少,但問題始終冇解決過,得閒嘈不如諗下係咩原因。

得獎名單太易估,唔洗睇都知結果,冇期待。好簡單,一個冇變數、結果好易預測嘅頒獎禮吸引力一定大減,呢個情況係今屆奧斯卡最明顯,幾個大獎得獎名單同之前舉辦嘅金球獎以及有「英國奧斯卡」之稱嘅英國影藝學院電影獎一模一樣,包括最佳導演、最佳男女主角、最佳男女配角,一個劇透晒嘅電影自然會少咗人睇,對不?

509093b671c56982f7d3952ae91b5390--rumor-quotes-true-quotes

其實結果咁易預測都係因為競爭唔夠激烈。講到尾都係選擇少先令到結果太易估,以前一個獎至少有3-4套電影有力問鼎,就算事前走漏風聲,未到公布一刻結果都係一個問號,所以先會咁緊張刺激,先會咁多人想睇。的確今屆競爭明顯冇以前咁激,亦可以話電影可以爭嘅獎項分得好鮮明,例如《黑暗對峙》其實只有能力去爭最佳男主角,唔似以前大亂鬥,一部電影有多個提名,乜都可以爭一餐,形成競爭少咗嘅局面,睇頭自然跟著少啦。

奧斯卡頒獎禮過於政治化都削弱可觀性。話明電影頒獎禮,講到底都要以電影做主題核心,偶爾帶少少政治話題入去都係一件好事,無奈嘅係近年越黎越多明星將呢個電影舞台變成一個政治宣傳活動,之前批評白人當道太少黑人入圍,今年就講女權、#Timesup #Metoo性侵犯風波,俾人感覺就好似睇緊一班明星做政治show一樣。大佬我都係想睇個頒獎禮姐,有冇必要將一個娛樂舞台變成政治舞台?而且近年有越黎越多嘅政治事件帶入去奧斯卡,扭曲緊頒獎禮嘅本意,過份政治化嘅娛樂節目盞趕客,冇眼睇。

有時睇到想一野熄咗部電視download

最後,最現實嘅原因就係,唔一定要睇直播,而家科技一日千里,搵replay搵highlights易過借火,再加上全球速食文化影響之下,睇highlights齋睇重點,可以慳好多時間做自己野之餘又知個世界發生乜事,出街唔怕冇話題同FD吹,正呀喂!

螢幕快照 2018-03-07 下午5.09.04

 

(515)