【男の通識學】無限之戰最終BOSS:泰坦異類 THANOS

無限之戰最終BOSS:泰坦異類 THANOS

廣告

萬眾期待!Marvel超級英雄大亂鬥仲有1個月鬆啲嘅時間就會喺全球嘅大銀幕公開上映喇!嚴格啲嚟講應該係Marvel Studios十年磨一劍嘅終極大作《復仇者聯盟3:無限之戰》!相信唔少MCU嘅Fans都係由2008嘅《鐵甲奇俠》開始追睇超級英雄電影系列,由初頭無乜期望、純粹娛樂嘅心態,慢慢變到對戲中某啲角色產生感情同共鳴、開始對Marvel世界產生投入感。而好多觀眾喺睇完電影過後亦都不忘以「腦補」形式持續進修,逐漸了解每位英雄角色嘅身世背景。喺天時地理人和配合底下,Marvel Studios不但冇因為電影嘅小改動同原先漫畫設定嘅分野而受到影響,反而電影當中有限度嘅角色描繪變成大家自行追求更多漫畫原設嘅細節故事,互補不足,從而建造出MCU電影世界觀,人物角色儲儲下都越嚟越多。連雷神導演Chris Hemsworth都先行劇透話《復仇者聯盟3:無限之戰》上下集出場嘅角色多達76位咁多呀!放心!今次唔再係同大家講Iron Man戰甲同埋蜘蛛俠嘅新戰衣,而係嗰位喺外太空坐「OSIM天皇椅」坐足10年嘅大奸角Thanos呀!Thanos可以講係Marvel旗下數一數二嘅超級大反派,首次登場就係喺1973年嘅《Iron Man》第55期,而Thanos呢個名由來係以希臘死神Thanatos衍生出嚟嘅!至於佢嘅身世就誇張囉!喺土星嘅衛星泰坦出生嘅Thanos係屬於Eternal神族嘅近親,本身能力設定基本上係遠超地球人㗎喇,具備高等智慧、超快速嘅回復能力、持久力,再加上佢天賦異稟嘅Deviant基因,令到佢身體可以抵禦大部分嘅物理攻擊而且仲可以百毒不侵,精神力可以媲美一啲以精神攻擊為傲嘅超級英雄,仲可以隨意控制宇宙之力釋放能量攻擊添呀!不過代價就係換嚟一身紫色嘅奇異膚色,而正正就係呢一點令到呢位角色喺成長階段被歧視同欺凌。身體雖然無堅不摧,但心靈飽受煎熬嘅Thanos喺機緣巧合底下遇上佢生存嘅唯一目標,就係毀滅宇宙!唔係唔係!冇咁快㗎條Timeline,正確啲嚟講係佢喺荒廢嘅神廟思索人生意義嗰時,遇到佢一生中最愛嘅死亡女神,之後為咗取悅佢不惜工本,走去摧毀其他星球不突止,仲想吸收地球嘅Cosmic Cube增強自身能力成為宇宙最高位嘅神(Earth-616)。

(672)